周立波前两日来广州讲海派清口，提到酒文化，佢认为中国好多地方都系“自伤、自残、伤害朋友”，但广州人酒风则相当“斯文”。佢对此大表认同。
广州人饮酒点“斯文”法呢？首先，广州人饮酒唔会劝，唔会揸住个杯灌人哋饮，就算碰过杯，都唔会勉强你干咗佢。相反，饮酒时听得最多嘅说话就系：“你随量。”呢句话有礼节性，代表体贴同关怀嘅态度。想饮几多未几多咯。如果不胜酒力，沾沾唇都可以咖，主人家唔会因此怪你唔俾面。
其次，广州人唔兴斗酒，只会敬酒。你饮一杯，佢会陪你一杯，然后热情咁帮你斟酒。你唔要，只须要用手捂一捂杯口，佢就识做了。“白酒杯摆一圈，边个饮晒边个叻”，呢啲绝对唔系广州人作风。如果自己唔饮得，笑笑放低酒杯就可以了，亦唔系一件丢架嘅事。一时好胜劈冧对方，搞到要送人哋返屋企，仲要被嫂夫人埋怨，呢种做法会被视为“陆荣霆睇相唔衰揾来衰”，绝非英雄所为。
不过，如果以此认为广州人唔饮得，咁就大错特错了。广州一向系酒类销售重地，曾经有“得广州市场者得天下”嘅讲法。仅就茅台而言，按照招商证券统计，2012年贵州茅台酒销量，第一系贵州，第二系北京、第三竟然就系貌似唔中意饮高度酒嘅广州！温文酒风之下浅斟慢酌，消耗酒量竟然惊人！慢慢饮，慢慢叹，情谊细水长流方得持久呢啲，未系广州人嘅智慧咯。
